राष्ट्रपति रामचन्द्र पौडेलद्वारा भोटेकोशी बाढी प्रभावित क्षेत्रको अवलोकन

काठमाडौँ । राष्ट्रपति रामचन्द्र पौडेलले भोटेकोशी नदीमा आएको बाढीबाट प्रभावित नुवाकोट र रसुवाका विभिन्न क्षेत्रको स्थलगत अवलोकन गरेका छन् । बाढीबाट भएको क्षति, उद्धार तथा राहतको अवस्थाबारे जानकारी लिन राष्ट्रपति पौडेल प्रभावित क्षेत्रमा पुगेका हुन् ।

अवलोकनका क्रममा उनले नुवाकोटको विदुरस्थित श्री नं. १ सैन्य तालिम केन्द्रमा जिल्लाका सुरक्षा निकायका प्रमुख तथा अन्य सरोकारवालासँग भेट गरी पछिल्लो अवस्थाबारे जानकारी लिए ।

राष्ट्रपति पौडेललाई बाढी प्रभावित क्षेत्रमा भइरहेको खोज तथा उद्धार, राहत वितरण, होल्डिङ सेन्टरको सञ्चालन तथा पुनरुत्थानका लागि भइरहेका प्रयासबारे जानकारी गराइएको थियो ।

नुवाकोटका प्रमुख जिल्ला अधिकारी शम्भुप्रसाद रेग्मीका अनुसार जिल्लाको स्थलगत अवलोकन तथा अवस्थाबारे जानकारी लिएपछि राष्ट्रपति पौडेल रसुवातर्फ लागेका छन् ।

भोटेकोशी नदीमा आएको बाढीका कारण रसुवा र नुवाकोटका विभिन्न क्षेत्रमा ठूलो क्षति पुगेपछि राष्ट्रपति पौडेलले प्रभावित क्षेत्रमै पुगेर अवस्था बुझेका हुन् ।