दोलखा कांग्रेसले ११३ औं वीपी जयन्ती मनायो

चरिकोट। नेपाली कांग्रेस दोलखाले विविध कार्यक्रमका साथ ११३ औं वीपी जयन्ती मनाएको छ। बुधबार दोलखा कांग्रेसको पार्टी कार्यालय चरिकोटमा आयोजित एक विशेष समारोहका बीच वीपी  जयन्ती मनाइएको हो।

नेपाली कांग्रेस दोलखाका सभापति वर्मा लामाको सभापतित्वमा सम्पन्न उक्त कार्यक्रममा दोलखा कांग्रेसका नेता तथा भीमेश्वर नगरपालिकाका प्रमुख (मेयर) ईश्वरनारायण मानन्धर लगायत जिल्लास्थित उपलब्ध नेता, कार्यकर्ता तथा शुभेच्छुकहरूको बाक्लो उपस्थिति रहेको थियो।

कार्यक्रमलाई सम्बोधन गर्दै सभापति वर्मा लामाले प्रथम जननिर्वाचित प्रधानमन्त्री एवं नेपाली कांग्रेसका संस्थापक नेता महामानव विश्वेश्वरप्रसाद कोइराला (वीपी) को योगदान र त्यागको स्मरण गर्नुभयो। उहाँले निरङ्कुश पञ्चायती व्यवस्थाको अन्त्य र प्रजातन्त्र स्थापनाका लागि बिपी कोइरालाले खेलेको भूमिका इतिहासमै अतुलनीय रहेको बताउनुभयो।

सभापति लामाले वीपीले अघि सार्नुभएको 'राष्ट्रिय मेलमिलापको नीति' आजको राजनीतिमा झनै सान्दर्भिक बनेको उल्लेख गर्दै भन्नुभयो, वीपी सधैं जनताको सच्चा सेवक बनेर नेपाली जनताको हक-अधिकारका लागि लड्नुभयो। उहाँको यही विचार र निष्ठालाई आत्मसात् गर्दै अघि बढ्नु नै आज वीपीप्रतिको सच्चा श्रद्धाञ्जली हुनेछ।"

कार्यक्रममा भीमेश्वर नगरपालिकाका मेयर ईश्वरनारायण मानन्धर लगायत अन्य नेताहरूले पनि वीपीको  प्रजातान्त्रिक समाजवाद, विचार र विचारप्रतिको निष्ठाबारे आ-आफ्नो धारणा राख्नुभएको थियो। उपस्थित नेता-कार्यकर्ताहरूले वीपीको तस्बिरमा माल्यार्पण गर्दै उहाँको विचार र आदर्शलाई सधैं जीवन्त राख्ने प्रतिबद्धता जनाएका छन्।